Ձեր վստահելի աղբյուրը

Ադրբեջանի իշխանությունները ոչնչացնում են իրանցի բանաստեղծ Նիզամի Գյանջավիի գերեզմանի՝ պարսկերենով գրված զարդաքանդակները: Այդ մասին նշված է իրանական «ազարիհա.օրգ» կայքում թողարկված հոդվածում:

Իրանական աղբյուրը նշում է, որ Նիզամի Գյանջավիի գերեզմանի պատերին ամրացված զարդաքանդակները, որոնց վրա բանաստեղծի՝ պարսկերեն լեզվով բանաստեղծություններ էին գրված, վերանորոգման պատրվակով քանդվել են, սակայն կրկին չեն ամրացվել:

Հոդվածի հեղինակը, անդրադառնալով վերոնշյալ փաստին գրում է. «Վերջին տարիներին Արդբեջանը համատարած կերպով աղավաղում է իրանցի հայտնի բանաստեղծ Նիզամի Գյանջավիի ինքնությունը: Այդ առթիվ, վերջերս «Հեյդար Ալիևի հիմնադրամը» Հռոմի քաղաքապետարանին 110 հազար եվրո է վճարել, որպեսզի այնտեղի հրապարակներից մեկում տեղադրվի Նիզամի Գյանջավիի արձանը, սակայն որպես ադրբեջանական գրող. Հարկ է նշել, որ դրա դեմ իրենց բողոքն արտահայտեցին իտալացի հետազոտողները»:

«Նիզամի Գյանջավիին, որը բացի պարսկերենից, նույնիսկ մեկ բեյթ (երկտող) չի գրել, Ադրբեջանը անցնող 20 տարիների ընթացքում դպրոցական դասագրքերում ներկայացնում է որպես ադրբեջանական գրող: Ավելին, անցնող տարիների ընթացքում, Ադրբեջանը պարսկերեն վերջածանց (զադե) ունեցող անձնանունները նույնպես փոխում է»,-հավելում է իրանական աղբյուրը:

Իրանական «ՖԱՐՍ» լրատվական գործակալությունը հաղորդում է, որ ԻԻՀ ԱԳՆ մամլո խոսնակ Սեյյեդ Աբբաս Արաղչին, լրագրողների հետ հանդիպման ժամանակ, անդրադառնալով վերոնշյալ հայտարարությանը, մասնավորապես նշել է. «Եթե Ադրբեջանի կողմից Նիզամի Գյանջավիի գերեզմանի պատերին գրված պարսկերեն բանաստեղծությունները թյուրքերենով փոխարինվեն, ապա այդ քայլը չի կարող փոխել պարսկալեզու բանաստեղծի պատմական և մշակութային ինքնությունը»:

Նկատենք, որ իրանական կայքերը, հղում անելով ադրբեջանական ԶԼՄ-ներին, տեղեկացնում են, որ 2014թ. Ադրբեջանում թողարկվելու են թղթադրամներ, որոնց վրա պատկերված է լինելու իրանցի բանաստեղծ Նիզամի Գյանջավիի նկարը:

Այդ առնչությամբ Թեհրանի համալսարանի գիտխորհրդի անդամ Ղոլամ Աբբաս Աքբարին նախօրեին լրագրողների հետ հանդիպման ժամանակ հայտարարել է, որ Ադրբեջանը, չունենալով հին պատմություն, ցանկացած միջոցի դիմում է, որպեսզի իր համար մշակույթ ստեղծի:

Նշենք, որ Ադրբեջանը բացի իրանցի բանաստեղծին որպես ադրբեջանական ներկայացնելուց, սեփականացնում է նաև իրանական երաժշտական գործիքները, ինչն էլ հարուցում է իրանցի պաշտոնյաների և արվեստագետների դժգոհությունը:

Նախորդող հրապարակումներ՝ Իրանցի գիտնականը քննադատել է Ադրբեջանի կողմից պարսից բանաստեղծ Նիզամի Գյանջավիի նկարը մանաթի վրա պատկերելու փաստը

«Նիզամի Գյանջևին Իրանի գրականության մեծագույն դասականներից է, ով ստեղծագործել է բացառապես պարսկերենով»

Իրանցի պատգամավոր. Եթե Ադրբեջանը շարունակի շահարկել Նիզամի Գյանջավիի պատկանելիության հարցը, ապա կբողոքենք միջազգային ատյաններում

Իրանը պատրաստ է համագործակցել հայ գիտնականների հետ` մզկիթի և թառի ծագումնաբանության հետ կապված

Իրանական «թառը» ՅՈՒՆԵՍԿՕ-ում գրանցվել է որպես ադրբեջանական. Իրանցի երաժշտագետները բողոքում են

Իրանական կայք. Ադրբեջանը մտադիր է պարսկալեզու բանաստեղծ Նիզամի Գյանջավիին կեղծված տարբերակով ներկայացնել Չինաստանին